مصطلحات منعرفش معناها

في مفاهيم اقتصادية كتير بتقابلنا كتير مع اعتبار كل واحد انه بقا محلل اقتصادي لنفسه وبما إننا مصريين ومينفعش نقول على حاجة *منعرفهاش* بتختلط الأمور ببعض وبنلاقي الدنيا تاهت في نص الكلام علشان كدا دي مجموعة من المصطلحات اللي بنسمعها في الاقتصاد القريبة من بعض والمختلفة عن بعضها..

الاقتصاد الجزئي :

ودا كلنا درسناه في أول سنة لينا في الكلية التيرم الأول، ودا بيهتم بدراسة سلوك الوحدات يعني فرد واحد شركة واحدة منظمة واحدة وهكذا، بندرس بيه سلوك المنتج او المستهلك الواحد وبنحدد ازاي ناخد قرار اقتصادي وعلى اساسه بيتم تحديد كمية العرض والطلب وتحديد العلاقة بين البائع والمشتري.

الاقتصاد الكلي :

ودا بندرسه في التيرم التاني لأولى تجارة وهو ببساطة دراسة الوحدات الإقتصادية (اللي اتكلمنا عنها في الإقتصاد الجزئي) مجمعة بالتالي بيهتم بدراسة كيفية عمل الاقتصاد القومي كله ودا عن طريق حاجات كتير منها معدلات البطالة والناتج المحلي الإجمالي وغيرهم ودا علشان نفهم الاقتصاد المحلي والعالمي.

إجمالي الناتج القومي :

قومي يعني وطني يعني إجمالي اللي الدولة بتنتجه خلال فترة زمنية معينة من سلع أو خدمات سواء كان جوا البلد أو خارجها، يعني باختصار بيحسب صافي العائد سواء كان وسائل الإنتاج داخل البلد أو برا.

إجمالي الناتج المحلي :

ودا بيتم حسابه في اللي داخل حدود الدولة نفسها ، وهو القيمة النقدية لكل الخدمات والسلع المقدمة داخل حدود الدولة باستخدام عناصر انتاج محلية، عادة بيتم حسابه سنويا بس نقدر نحسبه كل 3 شهور.

إجمالي الدخل القومي :

مجموع عوائد عناصر الإنتاج الوطنية اللي بنستخدمها في الإنتاج خلال فترة معينة سواء كان جوا البلد أو براها

إجمالي الدخل المحلي :

مجموع عوائد عناصر الإنتاج اللي بنستخدمها داخل الدولة، سواء كان ملك محلي أو مملوك من الأجانب خلال فترة معينة.

الدخل الشخصي :

المقبوضات ،أو المبالغ -النقدية- اللي بيحصل عليها عناصر الإنتاج قبل خصم الضرائب المباشرة، سواء كانت مقابل مشاركة في العملية الانتاجية أو لا .

الدخل الشخصي المتاح :

الدخل اللي يقدر صاحبه يتصرف فيه، ودا مجموع الدخول اللي بيحصل عليها الفرد بعد خصم الضرائب المباشرة.

التضخم :

زيادة مستمرة في أسعار السلع مع انخفاض القدرة الشرائية لعملة البلد ودا بيؤدي فيما بعد لتقلص القدرة الشرائية لأموال الافراد.

الموازنة العامة للدولة :

بيان تقديري بيقدم نظرة توقعية تشمل الإيرادات العامة المقدرة المنتظر تحصيلها والمصروفات العامة اللي المفروض نصرف في حدودها خلال سنة مالية مقبلة . باختصار هي خطة سنة مالية جاية.

عجز الموازنة العامة للدولة :

عجز الموازنة العامة بيحصل بسبب تقصير الإيرادات العامة في تغطية المصروفات العامة والدولة بتحاول تتجنب العجز ولو حصل بتبدأ تغطي العجز بالإحتياطي العام أو غرض الضرائب أو الإقتراض.

دي المصطلحات الأكثر شيوعاً بين الناس دلوقتي سواء كان على السوشيال ميديا أو في الحياة العامة ودا بسبب ظهور المشاكل الاقتصادية بوضوح ولجوء الناس للكلام بيها.

---

©shababtegara