مواد فرقة أولى

مساء الفل للناس بتوع بالليل وصباح الفل للناس بتوع الصبح

هنتكلم عن مواد التيرم الاول ( فرقه اولي ) بس ف البدايه حابين نوضح حاجه عايزينك تنسي كل حاجه متعلقه بثانويه عامه ال انت لسه خارج منها يعني شغل الاستظراف والمدرسه ويا مستر والعيال الخنيقه ال بيرخموا عليك ف الكلاااس انساهم تماما انت دلوقتي دخلت الكليه وبقيت طالب جامعي ودي بداية مرحله تعليميه وحياتيه جديده حاول تخرج منها وانت سايب اثر طيب ندخل بقي ف المواد بص يا سيدي انت عندك ف التيرم الاول 6 مواد والتيرم التاني 6 مواد ومعاهم ماده اسمها حقوق انسان ودي مشتركه بين كل الكليات ومش بتضاف للمجموع ايه هما بقي موادالتيرم الاول ؟ ركز معايا يا صاحبي ..

______________________

1 _ مباديء المحاسبه المالية .. ودي من اهم المواد ال لازم تركز عليها جدا جدا جدا لانها الف باء محاسبه ومن غيرها مش هتفهم حاجه ف السنين الجايه ، اوعي تهملها او تنفضلها يا معلم انا بحذرك خليك معاها اول ب اول .

____________________

2_ رياضيات الاعمال .. ودي ماده كلها رياضه ف رياضه مقسومه ل جزئين جزء بيتكلم عن الاحتمالات وجزء تفاضل ونهايات وحاجات من ال معظمكوا اخدها ف ثانوي دي ؛ محتاجه منك حل كتير ومتابعه مع الدكتور ف المحاضره والمعيد ف السكشن ..

_____________________

3_أصول الادراه "ادارة الاعمال " ودي برضو الف باء اداره بتعرف يعني ايه اداره وتطورها والنظريات ال بتفسرها واتكلمت عنها ماده لذيذه وظريفه جدا بس اوعي تتعامل معاها ع انها مادة حفظ كده هتعقد نفسك حبها عشان هي تستاهل انها تتحب

_____________________

4_الاقتصاد .. الاقتصاد ف اولي خصوصا تيرم اول مش هتشوف ف حلاوته تاني والله حاجات كده حلويات عرض وطلب وعلاقة السعر بالكميه المعروضه زي مثلا لما حاجه بتشح ف السوق فتنزل سوق سوده بسعر عالي كده كميتها قليله ف سعرها بقي عالي كده ف علاقه عكسيه مذاكرتها كده حاجات من الواقع ووممتعه جدا ومش مرهقه ..

__________________

5_ اللغه

"الدراسات التجاريه باللغه الاوروبيه"

ودي جزئين جزء اداره وجزء اقتصاد ودي مش هقول حاجه عنها اكتر من انها مادة تقدير ..

_____________

6_الحاسب .. كلها حاجات عارفينها ومادة تقدير برضو

_____

بس كده الدنيا زي الفل اهي والحياه بينك متعقدوش نفسكم ومتحكموش ع ماده من اول او تاني محاضره ومتنسوش ان الجو هيبقى لسه جديد عليكم و بكره هتتعودوا .. تقعدوا بالعافيه #تعالى_أرسيك_ع_الحوار

#أسرة_شباب_تجارة

---